ഇനിയും ഒടുങ്ങാത്ത ദാഹമാണെനിക്ക് !
ഋതുക്കൾ മാഞ്ഞതറിയാതെ മഴക്കാറ് തേടിപ്പോമെ-
ന്നിണപ്പക്ഷിയിന്നു തളർന്നുറക്കമായി !
ഏതോ മരുപ്പച്ച തേടി പുലരിക്ക് മുന്നേ പറന്നിട്ടും,
സന്ധ്യയ്ക്കൊപ്പം തിരികെയണഞ്ഞെൻ
കൊക്കിലിറ്റമൃതം അലിവോടെ തന്നിട്ടും,
ഇനിയുമൊടുങ്ങാത്ത ദാഹമാണെനിക്ക് !
മഴയും മരുപ്പച്ചയും വേണ്ട, കൊക്കിലിറ്റിറ്റു വീഴും
നിൻ സ്നേഹത്തിന് ദയയും വേണ്ട !
ഒരു പകൽ മുഴുക്കെ എന്നരികത്തൊരു
ചിറകടി ശബ്ദം കേട്ടാൽ മതി ...
No comments:
Post a Comment